【「 日日見到富士山，開始行好運喇﹗」蔣雅文 】

移居台灣多年的蔣雅文 （Yawen），數年前首次參與GO OUT JAMBOREE，經歷狂風暴雨野外求生考驗，今年再次來到富士山下的著名露營場ふもとっぱら，隨著心態上的轉變，加上難得三日都見到富士山，Yawen 忍唔住對 GO OUT Hong Kong 高呼︰「勁好玩、無投訴，行好運，仲可以慳錢添﹗」What？

「今次係我第二次嚟到GO OUT JAMBOREE，上次嚟好似係2017、2018年，幾年前嘅我同而家嘅我分別好大，嗰陣時比較外貌協會，而家就比較著重機能性、 牌子背後環保理念，個人好似有內涵咗，哈哈﹗可能因為參與多咗戶外活動之後同大自然更加接近﹗第一次嚟嘅時候橫風橫雨，俾咗一個好大嘅衝擊我，心諗露營真係好辛苦喎，但係嗰一次都打開咗我嘅眼界，我好好奇點解喺我眼中咁辛苦嘅一種旅遊方式，但係有咁多人嚟參加﹗無論天氣幾差都好，佢哋都有辦法逆向思考，就算喺好差嘅狀態之下仍然樂在其中。」

「其實令我真正所謂入坑，係因為我好想了解呢一群人、了解唔同outdoor牌子。好多outdoor牌子有唔同理念，我自己又會思考到底蔣雅文係邊種風格？我啲朋友今次被我說咗嚟，佢哋都話『嘩！好正啊！好正啊！』我覺得新手更加要嚟，可以一次過學習、參考，同埋喺你投資裝備之前先睇一個展覽，最後就會慳咗好多不停換裝備嘅錢，我一開始就係要靚要可愛但係重到癲，跟住慢慢開始取向輕，輕到一個點就知道點樣可以又輕又靚，呢個過程需要好多學費﹗哈哈﹗不過如果你嚟到GO OUT JAMBOREE一個咁大型嘅活動，有咁多人可以教學，就可幾以慳返一筆錢，係好幾筆錢覺先啱﹗」

「今次我同呢一班朋友一齊，佢哋係嚟自台灣嘅一個燒烤團隊，專長喺野外不插電，只用木炭柴火去烹調食物。我哋之前一直有個夢想，想開露營車喺富士山下露營，因為喺台灣唔係咁容易完成呢個夢想，而且好似日本車型特別吸引人。今次租咗兩架露營車，你見細細架咁嘅van ，每一架可以塞咗6個人入去，加上尋晚真係好凍，好慶幸我哋租咗露營車。今次嚟到GO OUT JAMBOREE好幸運，好多嘢都迎刃而解，呢一班比我年輕嘅『小朋友』都好開心，有啲係第一次露營，我話『第一次露營就嚟呢度個門檻set到咁高』，佢哋好開心好感恩有咁嘅機會，同埋日日都見到富士山，呢個係一個好幸運嘅跡象，今年開始行好運喇！」