前Super Girls成員各有新發展，當中Yanny（陳穎欣）宣布正式加入試當真，Cheronna（吳嘉禧）亦將有新歌派台，疫情下各有各忙。今回找來熱愛出走野外嘅Cheronna，與鍾情宅在室內嘅Yanny野餐短聚。當露營愛好者不停訴說著有幾咁熱愛大自然，宅女忽然想起自己都曾經有出走戶外嘅美好回憶，大家愈講愈開心，因為一起出走嘅感覺真係好好﹗
而這麼多年以後，她唱歌她試當真
縱然五人女子組合Super Girls已成過去，但正所謂分開簡單抹去往事極難，即使一個講到明最愛留在室內嘆冷氣、一個揚言極愛同陽光玩遊戲，一個專注做演員一個專心唱歌，二人再見面仍有講唔完嘅話題。 Cheronna︰「即將推出新歌〈而這麼多年以後〉，搵嚟吳林峰作曲、Tim Lui填詞，主要講喺而家呢個社會情況下，好多人面對各種離離合合或生離死別，無論點都好我哋都要keep住留低最美嘅回憶喺心中。新歌MV都係喺露營場拍攝，因為我太鍾意戶外喇﹗」
Yanny：「我而家主要都係忙緊《試當真》，仲有啲劇本傾緊，同埋好努力做緊我嘅YouTube Channel，想拍多啲vlog 。而家每次幕前工作都係偷師，望吓攝影師點樣擺機位，譬如我哋今日拍攝、我特登帶咗相機仔記錄返每個moment，想記錄生活嘅片段，係好開心嘅事。」
當野外女子遇上宅家女子
曾在某露營活動遇過Cheronna，加上留意到她的社交平台那些充滿陽光的照片，早知道擁有健康膚色的她是戶外活動愛好者。皮膚白如雪的Yanny恰好相反，自言夏天最愛留在室內嘆冷氣，反而好奇go out有咩咁好玩﹗Cheronna︰「好多謝GO OUT Hong Kong嘅邀請，我好鍾意戶外活動、最鍾意同陽光玩遊戲﹗咁多種戶外活動當中，自己最鍾意camping ，因為同時間可以享受大自然，又可以同朋友一齊煮嘢食、一齊體驗露營嘅樂趣，仲可以帶埋寵物添﹗」
Yanny︰「我係超鍾意室內，但係我發覺有時喺海邊坐吓吹吓風，都幾享受﹗其實點解我咁少去郊外呢，唔係唔鍾意﹐我好鍾意睇大自然嘅嘢，但我好驚蝴蝶 ﹐我曾經試過去類似宿營活動，燒烤嗰陣見到好多蝴蝶，嗰個星期不停有幻覺見到好多蝴蝶周圍飛，超驚恐﹗」原來Yanny只係怕蝴蝶、唔係怕戶外！
煮食裝飾都需要儀式感
講講吓，Yanny已經提咗幾次其實自己都鍾意大自然，「好感謝自己入咗呢個行業，諗諗吓我試過夜遊龍虎山、爬樹、騎馬，然後發覺戶外活動唔係我想像中咁辛苦，都有好多樂趣同埋開心位。」平時睇Yanny嘅vlog教煮嘢食睇得多，原來今回戶外之旅都係煮食部分令佢最回味﹗Yanny︰「我最鍾意係煮嘢食嗰part，煮同用嘅嘢都好靚。之前睇到好多人網上分享啲煮嘢食片，心諗『吓﹗咁都煮到咁精緻嘅嘢食？』令我諗起細個行山，食嗰碗即食麵同埋飲嗰杯奶茶，同喺屋企係好唔同㗎﹗同埋露營嘅產品好靚， 又可以擺喺屋企，令我呢一啲可能對戶外活動唔係好有興趣嘅人都會想參與，喺屋企見到啲靚裝備都好似有camping嘅氣氛會好開心。多謝你哋製造呢個機會畀我同Cheronna聚吓，亦令我學識咗原來咁樣野餐都幾好玩吖﹗」
Yanny鍾意煮食，Cheronna就熱愛裝飾︰「我好重視氣氛，尤其是燈飾，燈可以令成件事唔同，如果淨係一盞白燈就唔夠浪漫唔夠chill。我係好enjoy掛燈飾，每次就算好辛苦都要計好晒平唔平均靚唔靚，掛好串串燈等太陽落山，開燈嗰下就係camping最開心時刻。夜晚可以睇星星，又可以喺一個好舒服嘅環境狀態，大家播住音樂煮嘢食、傾偈玩board game，我覺得好enjoy！」
（待續）
--------------------------------------------------------------
追蹤《GO OUT Hong Kong》
Instagram / goout_hongkong
Facebook / GoOutHongKong
YouTube / GO OUT Hong Kong
Online store / goout.com.hk