【露營美學 の 重要性 / Camping就係要有家的感覺。/Daisukgor】

#INTERVIEW

 

 

疫情令全球人類生活起了重大變化,曾幾何時,Daisukgor過著日飛夜飛的fashion buyer生活,當疫情開始,被迫停下來嘅佢開始細想自己到底鍾意做乜?答案就是CampingCamping最緊要有家的感覺、功能與美感並重嘅裝備,同埋令氣氛升溫嘅焚火時光,點解?有請Daisukgor分享﹗

Daisukgor

  • 露營場ROUTE9 主理人
  • 曾任時裝買手十多年

帳篷/Nordisk Asgard 12.6 Tent
手拉車/Nordisk Cotton Canvas Wagon

露營成為生活一部分

曾幾何時,身為時裝買手嘅Daisukgor需於日本、韓國及香港三地穿梭,十幾年如是。疫情來了,停下來想起從前露營的點滴,驀然發現原來很想念露營生活。「第一次去露營大約係1819年前,我記得當時係諗住行麥理浩徑兩日一夜,所以背囊放咗好鬼多嘢,驚行到臭衫都有幾套,好似行Fashion show咁﹗疫情之後困咗喺香港,我就開始諗會唔會可以做返自己鍾意做嘅嘢呢?自從開始Car camping,可以玩啲好重型嘅嘢,最重要係開始有啲好乾淨嘅廁所、可以沖涼、可以煮食,於是露營就成為咗我生活嘅一部分。我每次去露營都可以擺我鍾意嘅嘢出嚟,又可以同啲小朋友玩,成個過程好開心,心情好放鬆。」

木摺櫈/DAISUK
六角檯/DAISUK
氣燈/Coleman
儲物箱/DULTON JAPAN
水杯/OVJECT

 

好似搬咗屋企去戶外

 露營的意義因人而異,對Daisukgor來說,露營就係要有家的感覺。「我鍾意露營好似將屋企搬咗去第二度,就好似你有間別墅,你返咗屋企可以慢慢享受,就算只係坐喺度好無聊玩吓電話睇吓書,其實都好開心。你知以前住屋嘅環境好細,好難可以放咁多你鍾意嘅嘢出嚟,既然我嘥咗咁多時間搜集自己鍾意嘅嘢,難得可以group埋一齊放喺一個地方,我唔介意花半日時間去做setting,就算只係玩兩日一夜我都好enjoy。我會鍾意啲營比較大、高身,大家可以企入嚟,坐喺度好舒服咁傾偈。」好多人認為營仔細細瞓到就夠,Daisukgor卻直言「最唔鍾意瞓覺先捐到入去嗰種感覺。」

行軍床/Nordisk
保溫箱/Coleman
地毯/POST GENERAL

 

重視美學亦重視功能

靚,有邊個唔鍾意?Daisukgor自認貪靚,但功能都唔可以差。「我記得開始追求露營美學,應該係由呢個Nordisk Tent開始,大約3年前喺日本買返嚟,日本啲露營裝備鋪頭好齊全好正,有好多好精緻嘅Gear,好多嘢都想買﹗重點係好似全部嘢都可以喺屋企用,日常可以用得到去Camping又可以帶埋去,咁就最實用﹗其實我都好揀擇,譬如話啲燈,Barebones嘅燈除咗個樣靚仔之外,功能性都好強,同埋佢價錢唔貴,令我好想介紹畀人,呢啲咁靚嘅嘢點會有人抗拒呢?又譬如呢個日本版Iwatani Gas爐又細又方便又防風,最緊要承重量好,買個盆菜返嚟12個人圍住都得,如果朋友屋企無爐,帶去佢屋企用都得啦﹗」

 

Gas 爐/Iwatani JAPAN

鐵路燈 /BAREBONES

 

 

開心share個入風格

每個人嘅露營美學都唔同,話自己「好揀擇」嘅Daisukgor建議大家多啲開心share,可以幫到自己建構個人風格之餘,更容易搵到真心鍾意嘅裝備。「我以前成日飛日本,每次都會托好多日本雜誌返嚟,特別係《GO OUT》,一定要睇﹗睇多啲雜誌、上網了解多啲露營文化,同朋友交流吓。對我嚟講,擺自己鍾意嘅gear出嚟係一種享受,有時自己set up完會影相再分享上社交平台,希望大家見到會有啲啟發性,因為好多人唔係一開始就買到自己鍾意嘅嘢,要試咗好幾次之後先至搵到自己想要咩風格。」


焚火有好強嘅凝聚力

去露營,人物重要、裝備重要,氣氛喺Daisukgor心目中同樣重要。「焚火帶畀我哋溫暖舒服嘅氣氛,而且有一種好強嘅凝聚力,當你成班朋友一齊圍住團火、望住個火傾偈都特別開心,咁就一晚㗎喇﹗目前香港唔係有好多營地可以玩到焚火,所以我就開咗九段呢個地方,可以畀人喺呢個位置盡情玩焚火。」望住熊熊烈火,Daisukgor一臉滿足,細細聲講︰「我心目中最想去嘅Camping,就係可以去東京富士山下嘅GO OUT CAMP,困住咗兩三年啦,好想喺富士山下焚火。」我都想啊,承你貴言。 

Guest / Daisukgor 
Text / Phoebe Chan
Art Director / Kenneth Chan
Assistant / Bonita
Photographer / Marie Anson
Design / KiKi Wong
Special thanks / Route9camp

--------------------------------------------------------------

追蹤《GO OUT Hong Kong》

Instagram / goout_hongkong
Facebook / GoOutHongKong
YouTube / GO OUT Hong Kong
Online store / goout.com.hk  


較舊的貼文 較新的貼文


發表留言

請注意,留言須先通過審核才會發佈