「從來沒有想過自己會是享受戶外的一群，因為一個疫情把所有人的習性都改變了。」Alfred 許廷鏗在他的帖文寫道。相信很多人也和Alfred一樣，因疫情而踏出出走野外的關鍵一步。年多前Alfred接受GO OUT Hong Kong 訪問時曾揚言好想去GO OUT CAMP在富士山下露營，機會話嚟就嚟， GO OUT JAMBOREE終於回歸，感恩Alfred在百忙之中抽空與GO OUT Hong Kong團隊同行，成為這個大型露營音樂祭的特別嘉賓﹗
Camping係世界通行語言
Alfred向來鍾情日本品牌 FUNDAMENTAL，今回帶同品牌全套裝備來到富士山下露營，由帳篷到桌椅、裝飾燈等，看來做足準備與同場campers進行裝備競賽。「除咗日本人之外，仲有好多唔同地方嘅朋友參與，有香港啦、台灣啦、韓國啦， 我哋可以互相觀摩一下大家嘅帳篷裝備，又可以睇吓點set up甚至煮咩嘢食。有一晚食緊飯嘅時候，有一個得意嘅偶遇，有班韓國嘅朋友仔過嚟介紹一個韓國牌子，之後佢見到我個天幕就話『Korean brand』，因為我個天幕都係一個韓國牌子。所以話 Camping係世界通行嘅語言，好開心今次有機會好好觀摩睇吓人哋啲『示範單位』，我覺得係幾好嘅體驗，如果大家對Camping有興趣嘅話，呢個係一個聖殿，好值得嚟﹗」
值得香港人學習嘅廁所
嚟到GO OUT JAMBOREE點止可以露營，仲有音樂聽、有裝備買、更有好嘢食，一次過滿足大家食買玩chill嘅心願。Alfred︰「喺呢個festival可以睇到好多唔同類型嘅音樂表演，以前無諗過原來camping嘅時候聽reggae係咁正，你會好不由自主地一路跟住佢搖一路喺度䟴。除此之外，有好多唔同嘅攤檔，世界各地不同品牌都喺度擺pop－up store，我頭先都啱啱買咗嘢﹗」今年Brand Avenue再度匯聚多國戶外品牌，還有結集日本本土及手作品牌的Market Village，以及食到Alfred停唔到口嘅美食車及攤檔。「不得不提，佢哋個廁所真係 keep得好乾淨，呢一點令我非常之感恩，坦白講呢一樣嘢香港係要學嘅，如果大家去outdoor festival嗰陣對於廁所衛生管理盡責啲，自己用得好啲下一手都無咁輕易想整污糟，呢啲嘢要學﹗」絕對同意，幾年前筆者第一次去GO OUT JAMBOREE時已被乾淨無臭嘅廁所震懾到，萬幾人去過都咁乾淨？正所謂事在人為，只要大家出一分力，就可以happy go out！
雖然三日兩夜GO OUT JAMBOREE 2023當中嘅第二日，富士山被厚厚雲層遮擋著，但係我哋第一日到著時係好清楚見到大大個富士山，到第三日臨別之時富士山再出現喺我哋眼前，太陽也出來了，並將帳篷上露水迅速曬乾，簡直係天公追美。感恩今回GO OUT Hong Kong團隊可以與佛 (Alfred) 同行，10月富士山下GO OUT CAMP再見！
Text / Phoebe Chan
Photographer / Marie Anson
Special thanks / GO OUT JAPAN & HK
--------------------------------------------------------------
追蹤《GO OUT Hong Kong》
Instagram / goout_hongkong
Facebook / GoOutHongKong
YouTube / GO OUT Hong Kong
Online store / goout.com.hk