忙唔忙？Alfred Hui （許廷鏗）就好忙喇﹗唔止忙做導師、牙醫、歌手兼搞新公司，今年更第一次拍電影。第一次對Alfred嚟講好重要，疫情下第一次去camping嘅美好經歷令佢自此迷上露營，camping嘅簡約純粹更令佢認真思考生活真正所需。
Alfred︰「當我哋飛唔到，其實仲有好多方法令自己放鬆，去camping嗰陣我可以真正放鬆。」如果累了，不如放慢腳步，搵個適合自己嘅方式出走，let’s go out!
疫下露營・一試上癮
「我期待咗做呢個訪問好耐﹗」訪問當日與Alfred（許廷鏗）會面一刻他興奮地說，我信。一來Alfred是《GO OUT》日本版的支持者，二來訪問拍攝過後，他便會跟朋友直落camping出走二日一夜。Alfred自言不是露營專家，但他享受每次露營的體驗。Alfred︰「應該由疫情開始講起，因為疫情之前我無諗過人生會對camping有興趣，我唔算有潔癖但係都怕揦鮓， 同埋一直覺得去露營要準備好多嘢又要有求生技能，我乜都冇。誤交損友啦囉﹗（笑）自從第一次跟朋友去camping之後就上咗癮，我好記得我第一次去露營，第二朝醒嘅時候係望住個日出，嗰一下你就會覺得好正好值得﹗第一次嘅良好經驗造就咗我之後會繼續想去，計埋今次我去過7、8次露營喇﹗」
身心放鬆・佛系露營
許廷鏗自言「今年好似試咗好多以前未試過嘅東西」，包括自組公司「自許紀錄」。新碟主打歌〈佛系人生〉唱出無論高高低低睇你點取態嘅佛系心態，原來Alfred嘅露營理念都係忠於佛系。Alfred︰「我去camping個習性係比較佛系嘅，唔係好鍾意計劃到行程好緊密。當平時嘅生活已經好密鑼緊鼓，我發現原來去露營嘅時候真係可以俾自己放鬆， 係個腦放鬆。 無乜行程㗎﹗鍾意就攞部相機出嚟影吓相、沖吓咖啡、磨吓咖啡豆、整啲簡單嘢食， 同朋友吹水睇星，玩啲平時日常生活唔會玩嘅遊戲，喺camping嘅世界係純樸啲。當我哋飛唔到，其實仲有好多方法可以令自己放鬆。」
親近自然・基本需要
近月許廷鏗與梁祖堯一同擔任《全民造星IV》導師，早前Alfred更抽空觀賞梁祖堯主演的舞台劇《 回憶的香港》。Alfred︰「好值得推介俾大家睇嘅舞台劇，當中有一幕演員問觀眾有幾耐無好好坐低望吓天睇吓星聽吓海浪聲，諗咗陣，原來我有。呢啲係人嘅基本需要，只係我哋有時會唔記得，以前比較少參與戶外活動，但係自從鍾意咗露營就多咗留意大自然。人大咗識欣賞嘅嘢都會有啲唔同，可能細個就追潮牌，大個咗就搵自己想要嘅生活模式。我鍾意同一大班朋友去camping ，因為我好懷緬中學雞生活嘅放縱放任，當你camping嗰陣身邊全部都係自己人， 就可以好放縱地去講想講嘅嘢。如果有機會我想帶阿Joyce（鄭欣宜）去露營，當我未係咁鍾意go out嘅時候，有日佢捉咗我去淺水灣行吓， 話我成日忙工作又掛住應付朋友需要而唔記得自己需要咩，其實出去行吓呼吸吓新鮮空氣真係好重要，好多謝佢提醒我。」
每個人去露營都有唔同嘅原因，有人熱愛親近大自然、有人享受同朋友聯誼吹水，有人熱衷於到郊外秘景打卡，亦有人純粹享受添置裝備嘅樂趣。上述種種都係Alfred（許廷鏗）近年迷上露營嘅原因， 佢仲話camping令佢反思日常生活其實係唔係真係需要咁多嘢，從另一角度諗，既然部分戶外用品可以喺日常生活中應用到，是否代表優質嘅camping gear更值得投資呢？先睇睇Alfred點講再慢慢反思啦﹗
露營裝備的民間智慧
每個人去camping有唔同嘅原因，有人熱愛親近大自然、有人享受同朋友聯誼吹水，有人熱衷於到郊外秘景打卡，亦有人純粹享受買gear（裝備）嘅樂趣。Alfred︰「我唔算鍾意買gear ，但係我鍾意睇人哋嘅gear。同朋友一齊camping 最好玩嘅地方，係唔同朋友都會出盡法寶帶好多gear，好多時gear喺製作上會滲咗啲民間智慧，設計靚同時好實用，而且好compact（袖珍）易於攜帶。」
「其中一個camping對我嘅影響，就係運用多咗屋企嘅空間，我屋企有個花園仔，以前一年都唔會出去一次，當我試過camping之後，先至醒起其實喺花園都睇到星。自此每當同朋友傾偈或者要傾公事brainstorm嗰陣，我就會諗不如喺出面傾啦，我都係攞返我張露營凳出嚟坐咋﹗」
日常真正需要的不多
自從喜歡上露營，筆者對裝備的物慾有增無減，這一點似乎與Alfred恰好相反。Alfred︰「Camping好似有影響到我生活上嘅一啲嘢，成日話斷捨離斷捨離斷啲咩呢？去幾日camping一個背囊已經得， 咁我哋日常生活其實係唔係真係需要咁多？
對我嚟講，有啲camping用品原來可以喺日常生活中應用到，例如我剛才講嘅露營凳。所以我就會諗，究竟有啲咩你係真係需要真係想要？ 同一時間會諗吓其實我想要嘅生活模式係點，我覺得呢個point好重要。」買露營裝備從來都是豐儉由人，然而大家須謹記，很多戶外裝備傢具同樣可以在家中使用，一物多用性價比高，自然值得投資。
渴望去日本camping
還有一個月不夠便踏入2022年，Alfred自言覺得今年算是超額完成，下一目標是「出一隻唔係退而求其次嘅唱片」，而且希望學多啲新嘢、甚至挑戰參演舞台劇。還有還有，就是希望自己有更多機會去露營之餘，身邊愈來愈多人享受camping。
Alfred︰「坦白講，camping未必係for everyone，但係如果你係ok 呢個idea， 我希望可以介紹多啲朋友嘗試，好似我咁第一次去camping嘅體驗好好，自然每次去camping都會搵到新嘅樂趣。呢排好忙，好需要放鬆，我等咗今日（去camping）好耐喇﹗」如果而家一切回覆正常，你估你仲會唔會咁恨去露營？「我想去日本camping﹗ 當我開始去camping之後，身邊啲朋友講返去日本露營嘅經驗， 其中有啲朋友話喺富士山下露營，可以睇到好多好多唔同嘅營好似睇示範單位咁，可惜我未親身去過，只係聽朋友講，所以我好渴望去日本camping﹗」大家咁話，我都好掛住GO OUT JAMBOREE!
Guest / Alfred HuiText / Phoebe Chan
Art Director / Kenneth Chan
Photographer / Marie Anson
Production Assistant / Bloom, James
Make Up Artist / Khaki Yan
Hair Stylist / Derek Li@Xenter
Design / KiKi Wong
Wardrobe /432HZ, Hide & Seek, THE NORTH FACE, new balance
Special thanks / Summit Dept
--------------------------------------------------------------
《GO OUT》日本官方授權中文版
Instagram / goout_hongkong
Facebook / GoOutHongKong
YouTube / GO OUT Hong Kong
Online store / goout.com.hk