疫情反覆，嚴重打亂全球人的生活。然而人心惶惶之際，總有人相信有危就有機。四個從事廣告業嘅露營愛好者，去年無工開嘅日子忽發奇想「不如搵啲嘢搞」，幸運地迅即遇上心儀鋪位，如是者森淼山具社（Summit Dept）就在紛亂的疫情下開業。
與傳統戶外露營用品店截然不同的是，這間隱身於深水埗與太子交界的小店﹐由門面到店內裝潢、貨品，均走實用與美感並重路線，就連其社交平台每個帖文也會hashtag #露營美學，因為森淼主理人們深信「靚真係好重要」。
疫情係一個契機
從事廣告業嘅Sting，去年與女友合作開設古物店。三位好友眼見Sting疫下開店似乎是「無工開」的一條血路，隨即決定合作打造以精品類露營用品為主的森淼山具社（Summit Dept）。Sting︰「疫情係一個契機，我哋四個都係做廣告嘅，大家都無工開就諗不如搵啲嘢搞﹐適逢疫情舖租下調，唔係根本唔會租到地舖。」喺人人爭住開網店嘅年代，點解反而想先開實體店呢？「租到呢間舖係緣份，最主要係因為我哋賣精品類嘅嘢，都想客人親身拎上手睇吓，摸吓件嘢嘅質感、重量，感受點解佢值呢個價錢。」
去咗旅行嘅感覺
近年多間咖啡店及特式小店爭相進駐深水埗，為這個平靜的小社區掀起巨浪。森淼山具社的店面設計簡約而奪目，改寫了楓樹街的風景，難怪成為此區打卡熱點之一。Sting︰「日本有好多我哋呢類型鋪頭仔，點解香港無呢？所以我哋就諗不如試下開一間，就算好細都好，咪賣啲精品類細細件嘅嘢囉。我哋好想行返日本嗰套精而簡，所以想開地鋪，裝修都希望日系啲，畀人一種去咗旅行嘅感覺﹗」訪問當日，眼見好多年輕男女喺門外駐足打卡，有理由懷疑佢哋根本唔知呢間小店賣乜。
貪靚嘅人需求增
疫情下去唔到外國旅行，愈來愈多人嘗試去露營止旅行癮，重點係愈來愈多貪靚嘅人去camping。「我覺得疫情之前無咁多人重視露營美學，一般玩開露營嘅人認為最緊要係functional，真係好專業咁去露營。但疫情開始之後，好多唔係專業嘅人或者初學者開始去露營，有啲貪靚嘅人買唔到想要嘅嘢，森淼就係想提供多啲選擇畀呢班人。其實香港亦有啲好資深嘅玩家好崇拜日本露營風格，一個牌子淨係做一樣嘢，做到最靚嗰份職人精神係會好吸引呢班資深玩家。」
露營美學好重要
到底咩係露營美學呢？Sting︰「其實好多人覺得露營美學係多餘嘅，但係我覺得就好似fashion、著衫一樣，有啲人覺得日常生活起居著件白色tee就OK，但有啲人會覺得著咩衫可以展示到自己嘅style 或者係lifestyle。我買一樣嘢，俾到人睇之餘我自己又開心，係滿足自己多過滿足人。我想話俾人知，露營可以有好多選擇，唔一定要五顏六色或者死氣沉沉，可以有好多變化，因為一個人可以carry唔同嘅露營用品，每次玩唔同風格。有時啲Friend都會問『你今次出嚟用咩營用咩裝啊？』大家都想夾吓style好似一team咁，咁樣影相影出嚟正好多﹗」
Oregonian Camper值得推介
森淼舖仔細細卻陳列了頗多精緻的露營裝備，當中包括《GO OUT Hong Kong》 網店goout.com.hk也有售的Oregonian Camper。「Oregonian Camper出嘅露營嘢主打軍風，顏色同風格上都係出面比較少有。特別推介一系列軍風收納用品，呢個牌子會幫人哋諗埋邊product應該點樣裝、點樣先方便，因為日本人去親camp都係出車咁滯，佢哋好注重點樣保護啲嘢，用咗OC嘅收納袋就可以將裝備分門別類而且好好保護，加上呢個brand嘅價錢算平，設計又獨特，我哋係呢個牌子嘅香港代理，希望多啲人認識一個咁好嘅品牌。」Sting滿有信心地說。
多女仔買露營嘢
唔知點解，好多人認為男性比較熱愛露營，可能因為女性對戶外環境嘅適應力無咁強。但係面對愈出愈靚嘅露營裝備，女性嘅消費能力就愈來愈高喇﹗「以前露營裝備多數都係target男仔為主，令人以為露營一定係軍風、好死氣沉沉，而家好多女仔都鍾意買露營嘅嘢，我哋開咗之後係有好多女仔嚟買嘢，佢哋見到靚gear會好開心，譬如我哋有入嘅水晶燈，佢哋會發晒癲話就算唔露營用擺喺屋企都靚， 好多都會開始諗將露營嘅嘢擺喺屋企，要襯到露營set嘢之餘，都想啲杯碟喺屋企都用得返﹗」
Lifestyle係成個生活
今時唔同往日呢句，絕對可以用嚟形容香港喺露營文化。「有啲上咗年紀嘅街坊話，佢哋印象中嘅露營仲停留喺幾廿年前用Gas爐煮個公仔麵，好刻苦，露營係要捱嘅……但係佢哋嚟到我哋鋪頭，見到啲嘢咁靚嘅，發現原來而家露營啲嘢係咁嘅，係靚到可以擺喺屋企添﹗所以有啲唔去露營嘅人都會買我哋啲嘢。其實可以Indoor Outdoor共用係好重要，因為Lifestyle呢樣嘢唔係出去先有，而係你成個生活﹐你喺屋企會想對住鍾意見到嘅嘢，就算去戶外都會想Keep住個style。咁就會令你更加捨得使錢去買靚嘢。喺香港可以露營嘅日子唔多，如果冬季用完嘅嘢喺屋企都可以用返，大家都會肯畀多啲錢投資落露營裝備。」
靚，好重要。除咗靚，森淼山具社眼中嘅露營美學仲有咩係不可或缺呢？Sting︰「火好重要，去露營有火同無火係差好遠。可惜香港有好多限制，就算Car Camping都唔可以隨便生火、唔可以隨便燒地，要做好多安全措施。但火係可以聚到一班人，成個氣氛會好唔同，無論個火係用嚟煮嘢食、就咁圍住傾偈，或者飲酒取暖，個火將camp入面嘅人凝聚埋一齊，森淼嘅露營美學就係火喇﹗」
www.summitdept.com
Text / Phoebe Chan
Art Director / Kenneth Chan
Photographer / Marie Anson
Design / KiKi Wong
Special thanks / Summit Dept
--------------------------------------------------------------
追蹤《GO OUT Hong Kong》
Instagram / goout_hongkong
Facebook / GoOutHongKong
YouTube / GO OUT Hong Kong
Online store / www.goout.com.hk