邀請Asha做訪問，因為筆者知道佢熱愛戶外活動，但我無諗過只係去過幾次露營嘅Asha會講得出「死都要去」咁誇張。Asha︰「真心鍾意camping﹗啊﹗最誇張係對上嗰次去camping，明明之後嗰日要返工，但係我死都要去，有種『嘩﹗今次唔去都唔知幾時有得再去嘅感覺』。」啱啊﹗今時今日，好多嘢唔係必然，無人會知幾時再有機會，所以我哋要好好珍惜每次出走山野嘅機會。
初次露營嘅負面經驗
露營對Asha嚟講算係新鮮事，撇取疫情後嘅兩三次露營體驗，第一次應追溯到六、七年前喺英國嘅不愉快經歷。Asha︰「嗰陣喺英國同阿姨住附近，有一日我哋喺無乜準備之下突然揸車去New Forest露營， 聽講New Forest好正，有鹿有馬，但係我哋唔記得英國好鬼凍，只係得一個營同埋睡袋，根本抵受唔到夜晚嘅低溫度， 最後入返車瞓，而且瞓得好辛苦。係一次負面經驗 ，但係有種激勵我下次要做好啲嘅感覺﹗」
去露營最緊要有廚師
對好多人嚟講，去露營幾乎全程都係食，Asha亦然，而且非常enjoy。「喺香港第一次去露營都係近期嘅事，我嘅裝備比較輕擎，因為露營場地有得租晒所有嘢，我淨係買咗睡袋﹐ 去到營地自己起好個營跟住就開始食，好casual 好chill﹗經過嗰次之後，我發現去露營最重要係一個廚師，佢係超重要嘅一個人物，我食咗十道菜，五個鐘無停過咁食，好誇張但係好幸福啊呢件事 ……你要我執柴無問題，但係講到煮嘢食，我淨係想坐喺度，我唔鍾意煮嘢食但係鍾意食， 哈哈﹗」
去多幾次自然有進步
識得從失敗中獲取經驗教訓嘅人最抵讚，所以我想讚吓Asha。「我覺得自己係因為經歷咗英國第一次camping嘅挫敗感，所以每次都會諗有咩做得唔夠好，例如我怕凍啊嘛，上次雖然係香港露營，但係我揀咗個睡袋係可以應付-7度，個個見到都笑我黐線，但係最終嗰晚瞓得最好嗰個係我﹗」
「我覺得去露營要有一張坐得好舒服嘅櫈，一個好好嘅power bank可以叉電。對女仔嚟講，化妝品梗係愈迷你愈好啦，最重要係concealer （遮瑕）同埋眼線 ，如果會對住火就最怕個妝溶，要化一個持久嘅妝，最好所有妝物都係防水。有時喺戶外真係未必有靚靚洗手間，我都試過有啲女仔朋友好怕就咁喺野外方便，我會諗『Just let it go﹗』唔好諗咁多﹗」
愛中性簡約露營風格
唔同人有唔同嘅露營風格，剛開始愛上露營嘅Asha尚未搵到最愛嘅camping style，不過佢認為中性最耐看。Asha︰「有啲女仔會買啲好繽紛好得意嘅gear，我唔係呢種style，我鍾意中性簡約風格，最好所有嘢係黑色，望落去會好舒服、好中性好minimal，最多可能會有軍綠色，不過我又有少少怕黑色營會熱，哈哈﹗我本身唔係一個好鍾意買嘢嘅人，但係camping gear真係好吸引，有啲好似仲靚過平時屋企用嘅嘢，有時會諗如果一樣件露營裝備係屋企同去camp都用得，咁咪仲抵﹗」
為露營可以去到好盡
邀請Asha做訪問，純粹因為筆者知道佢熱愛戶外活動，但我無諗過只去過幾次露營嘅Asha會講得出「死都要去」咁誇張。Asha︰「真心鍾意camping﹗啊﹗最誇張係對上嗰次去camping，明明之後嗰日要返工，但係我死都要去，有種『嘩﹗今次唔去都唔知幾時有得再去嘅感覺』。跟住嗰晚就真係瞓到暖笠笠都要迫自己起身返工。當時心態係『我返工﹗我都要去camp﹗』可能有啲人會覺得好誇張， camping之嘛使唔使咁樣把握，但係呢啲經驗唔係日日有，
就係做咗咁多年人我都唔係有好多次camping機會，當自己鍾意做嘅時候自然會想逃離一下、開心下，返啲相都會有種『嘩﹗好正嘅感覺』。」 今時今日，好多嘢唔係必然，無人會知幾時再有機會，所以我哋要好好珍惜每次出走山野嘅機會。
Guest / Asha Cuthbert
Text / Phoebe Chan
Art Director / Kenneth Chan
Photographer / Marie Anson
Assistant / Bloom
Wardrobe / WANDERS, NIKE
Make Up Artist / Judy Cheung @judymakeup
Hair Stylist / Chorus ko @MM Aveda
Design / KiKi Wong
Special thanks / Route 9 & Daisukgor
--------------------------------------------------------------
追蹤《GO OUT Hong Kong》
Instagram / goout_hongkong
Facebook / GoOutHongKong
YouTube / GO OUT Hong Kong
Online store / goout.com.hk