《GO OUT Hong Kong》走訪不同本土品牌／單位，將佢哋嘅故事帶到大家眼前。第一個登場嘅就係以輕量化為創作方向嘅戶外服裝品牌no more heAvy。受MYOG (Make Your Own Gear)文化影響而創立嘅no more heAvy，近年開始轉型為專為行山及戶外活動而設嘅服飾品牌。憑著主理人Mike及Jim嘅觸覺與堅持，no more heAvy出品不但比一般戶外服裝擁有更高顏值，質素亦愈來愈高，我哋編集部一致認為no more heAvy 絕對係一個必須要認識嘅名字。
要初步了解一個品牌﹐好多時可以從佢哋嘅名稱着手，因為品牌名稱背後大都隱藏住一啲messages或者佢哋嘅核心精神，咁no more heAvy個名又有咩意思嘅呢？
Mike：「no more heAvy係品牌名稱同時係我哋嘅理念，我哋嘅希望藉住個品牌同產品推動輕量化露營嘅風氣。香港同其他地方最大嘅分別係山同城市好接近，所以我哋放工又或者興之所至都可以去露營，希望大家去露營嘅時候唔需要孭好多裝備可以盡量輕量化，將不必要嘅嘢捨去，亦都將出走戶外嘅重心放返喺享受成個環境同大自然嗰一part。」
no more heAvy由Jim喺2017年所創立，直至2018年Mike的加入後，才正式開始售賣產品，真正朝著經營一個品牌的方向前進。Jim :「創立no more heAvy之前，我喺戶外潮流服裝店Mother工作，期間接觸咗好多唔同嘅日本戶外服飾同裝備品牌，又去過一個比較出名嘅日本戶外市集Off The Grid，見到好多手作職人所做嘅產品都好靚。嗰時我就諗其實都可以嘗試吓MYOG（Made My Own Gear)做啲袋俾自己用，於是就創立咗no more heAvy。一開始我喺網上訂啲X-Pac面料返嚟，用衣車車吓的細袋仔或者coins bag，再送俾朋友用。直至2018年我喺一次網上買賣交收時認識到阿Mike，發覺大家好投契好啱傾，最後就成為咗partner，開始一齊製作產品攞去唔同嘅市集售賣，正式開始經營品牌嘅旅程。」
Jim同Mike喺2018年開始售賣自製嘅銀包及各類型嘅袋，累積咗一年經驗嘅同時，亦認識到香港其實存在著好多同佢哋一樣以MYOG方式製作X-Pac小物嘅品牌，想要突圍而出就必須要與別不同。而當佢哋萌生求變嘅念頭時，就剛好認識咗一位專營成衣生產嘅朋友，而呢位朋友更提出可以幫佢哋製作服裝。終於喺經過一輪風險評估同內心交戰之後，Jim同Mike認為專門針對行山露營同戶外活動嘅輕量化服裝品牌似乎從未出現過，所以決定放手一搏，喺2020年初正式轉型創作原創服裝。
決定轉型成為服裝品牌後，Mike於去年二月辭去原本嘅工作，全情投入做no more heAvy，因為佢知道製作服裝所需要嘅時間比做袋更加長更加耐，唔「捨」棄原本擁有嘅，就絕對唔會有「得」。經過一年嘅努力，佢哋已經創作出兼顧布料延展性、長度比例以及耐用度嘅熱賣作品。今時今日，Marketing嘅工作就會交由Mike去負責，而喺產品設計同開發方面，Jim專責處理比較潮流、更適合配襯Urban Outdoor Style嘅單品，Mike就會專注做一啲較為專業，針對performance用家嘅作品，令no more haAvy喺今後可以發展出兩條line以滿足唔同客戶嘅需要。
no more haAvy由面世到而家已經有四年，Jim同Mike異口同聲話最難忘嘅係見到自家產品嘅受歡迎程度有顯著增長，再加上定咗嘅計劃同心願都一一達成。「幾年前因為機緣可以同日本輕量化戶外品牌YAMATOMICHI創辦人夏目璋先生一齊露營，佢當時講過 “Good function, it means good product. Good product, will become fashion.” 呢句說話令我哋清楚知道作為户外品牌功能係先決條件。我哋一直環繞著呢個理念去製作產品，而家雖然未叫做好成功，但睇著作品有愈嚟愈多支持者，建立到Show room，又可以定期搞吓Pop-up Store，心願喺今年一一實現，令我哋更清楚知道選擇做服飾係啱嘅，亦令我哋更有信心可以一直行落去。」
Mike及Jim話希望可以衝出香港打入其他地區市場之外，更希望可以做到好似Snow Peak咁，擁有自己嘅營地，而內裡嘅大少裝備都喺嚟自no more heAvy。呢個心願聽落好似有啲離地，但佢哋由當初自己做吓手作仔到認認真真咁做衫，到而家愈做愈專業，甚至創作出好多款非常受歡迎嘅作品，講明咗只要敢想敢做，無嘢係做唔到嘅，no more heAvy可以去得幾高幾遠？大家拭目以待！
Text / Kenneth Chan
Assistant / Phoebe Chan
Photographer / Marie Anson
Assistant / Bloom
Design / Kiki Wong
--------------------------------------------------------------
追蹤《GO OUT Hong Kong》
Instagram / goout_hongkong
Facebook / GoOutHongKong
YouTube / GO OUT Hong Kong
Online store / goout.com.hk